########################################################

Arriskuaren Xarma sortzeko jarrera bat da. Izan ere, buruari jartzen dizkiogun mugek sormena erasotu egiten dutenean, hau erretirada zentzugabe batean hasiko da. Izu-ikara basati bat, zer esango dutenaren fantasma prehistorikoa barrutik datorkigun errepresio ezaguna dugunontzat. Honela, Arriskuaren Xarma erretagoardian dagoen euspen dike bat da; honaino. Pentsamenduan errezitatu beharreko mantra bat, beldur hauen kontzientzia hartzeko eta distantzia batez begiratzeko.

Neu Troia-ren lehen lan luzea den disko honetan, energia honek gurutzatzen ditu abesti guztiak eta abestiak ez direna ere... Azala eta formatu fisikoaren diseinua, bideoklipak, testuak… Joera izaten ohi dugu artelan baten borobiltasuna goraipatzeko, erpinetan sortzen diren continuumaren haustura zeozer negatibotzat jotzen delako, artista on batek menperatu beharreko kaosa. Baina, zenbat unibertso berri sortuko genituzke kaosaren iturri agortezina ez bagenu ito beharko? Zergatik tematu marmolezko eskulturekin suari argazki bat egin ahal diogunean?

“Bilaketa bat egin genuen eta hau da topatu duguna. Ez gaude bereziki interesaturik musika estilo konkretu batekin lotzeko. Dagoen kriterio bakarra gustukoa geneukana eta ez geneukanaren artean bereiztea, eta horrek nolabait ematen dio koherentzia bat guztiari. Honengatik ere pentsatzen dugu mundu guztiarentzako tokia egongo dela diskoan. Batzuk abesti batzuekin identifikatuko dira gehiago, beste batzuk besteekin. Eta norbait guztiekin identifikatzen bada, kar kar kar, gure arima bikia edo horrelako zerbait izango da, kar kar kar, bai, entsegura gonbidatuko dugu ea taldean sartu nahi duen.”

Horrelako lan batetik ezta bere partaide direnen hitzetatik ezin liteke koherentzia handirik espero, eta honengatik, behin eta berriro topatuko ditugu kontraesanak sortu duten arrastoan. Pailazo hutsak dira, pailazo hitzak duen zentzu bakarrean; onean.

Arriskuaren Xarma etiketatzea aski erraza da; Popa, Indiea, Rocka, Folka, Elektronika, Psikodelia, edo hor nonbait dagoen zerbait. Entzuteko une konkretu bat gomendatu beharko bagenu, une post-euforiko batean izanen litzateke. Hau da, euforiaren tontorra ukitu eta jada maldan behera hasten den une horretan. Ospakizun barnerakoi eta lasaian entzun beharrekoa, nostalgiak ematen duen ziurtasunetik (zoriontasun gauzatua delako).

########################################################

2019ko udazkenean Gorka Gabilondo, Xabier Matxain eta Julen Azkonak Arriskuaren Xarma lan luzea izaten amaitu duen proiektuaren lehen oinarriak jartzen hasi ziren. Pandemiaren kolpea jaso ostean, proiektua kili-kolo geratu zen eta azkenean, bizitzako arrazoi pertsonal desberdinengatik, Xabierrek albo batera egitea erabaki zuen behinik behin.

MPC sanpleadorearen laguntzarekin, 2020ko udazkenean Julen eta Gorkaren artean abestiak sortzen hasi ziren, azken honen etxean astero geldituz. Gitarra akustikoa, sintetizadore geruzak eta erritmo errepikakorrak landuz gutxika abestiak eratuz joan ziren.

Bi urte beranduago, 2022ko udaberri inguruan, zortzi abestien demoak esku artean izanik, Xabierrekin eta Iker Vazquezekin jarri ziren harremanetan abestiak talde formatura eramateko asmoarekin. Urte betez elkarrekin lantzen ibili ondoren Intxaurrondoko kultur etxeko aretoetan, eta beste bi abesti berri errepertoriora batu ondoren, 2023ko udaberrian Bilboko El Tigre estudiora joan ziren abestiak grabatzera.

Jon Aguirrezabalaga izan zen abestiak grabatu, nahastu eta ekoitzi zituen soinu eta grabazio teknikaria. Ondoren, Alex Ferrer Bartzelonako The Groove estudioko teknikariari bidali zitzaizkion nahasketak eta honek masterizatu zituen.

2024ko martxoaren 1ean, Gorka Gabilondok garatutako diseinu grafikoa baliatuz, Arriskuaren Xarma lan luzea kaleratu da euskarri digitaletan zein CD eta binilo formatu fisikoetan.

Bildumaren promoziorako epean, hiru bideoklip eta lau aurrerapen abesti kaleratu ziren (azarotik martxorako epean). Bideoklipak Laura Ibañezek sortutako animazio bat jasotzen dute (Harro, 2023ko abenduak 1), autoekoiztutako bideo bat (Hego Haizea, 2024ko urtarrilak 15) eta Borja Suberbiolarekin egindako beste bideoklip bat (Psikofonia, 2024ko martxoak 1). Bideoklipetako abestietaz gain, beste abesti bat kaleratu zen (Zerumuga, 2023ko azaroak 15), lauak euskarri digitaletan soilik eta Gorka Gabilondok sorturiko diseinu grafikoak erabiliz.